Genesis 40
Josepgo te na yali po page haninani
1Tama bidali sogo dwasianu sesabi gana elama, tama te bomai ąį wain tonalubo tobolu bidi, me te bret nigibo be tonalubo tobolu bidi, augwali sigo te Isip tuni bidi Fero dali dwai sę me deli yali, aga te augwali sigo genuai bidi dao. 2Fero te sę tonalubo bidi si dali sębę elama, 3tama agai augwali si te ami bidi dabe tonalubo bidigo be teba muani. Augwali si te Josep augwaligo kalabusiba muani madi te kalabus beba naga muai. 4Tama te ami bidi dabe tonalubo bidigo te Josepgo te tobolu bidi si tau mabo bidi nigilali. Augwali si te sesabi elama gana te kalabuside bidama, 5tama me sogo hulide, te wain sę tonaluali tobolu bidigo, me te bret nigibo sę tonaluali tobolu bidi, te Isip tuni bidigo sę yali bidi sigo na yai. Te deli deligo na yali te na page me elaluali. 6Tama Josep te augwali si bidibo madi kigamu sabolali, tama agai te augwali si te homu sęgę elalubo suali. 7Tama agai augwali sibolo hanalu wali, “Magi baso te dage si homu sęgę elalubawe?”8Augwali sigo te po wai, “Da sigo te na yai. Tama ede te bidibo bidi mego te na yali po page da sibolo pusabo te meni yani,” wali.
Tama Josepgo augwalibolo te po wai, “Godigo naga te na yali page dabolo ola mabo usu dao. Tialima, dage sigo te na yali po enabolo waiąo,” wali.
9Tama tibaso, te wain tonalubo tobolu bidigo te na yali po pusali. Agai te po wai, “Te eno nade, eno te wain nigabo du walobo bono me deli suali. 10Tede te nologo sela elaluali. Te yabe dabe pedelama, tama polo te dudili pedelama, tama te ni wain du walama, tama tigidali tau ela silai. 11Eno te Ferogo kap tuali. Tialima, eno te wain du dabe selama, tama eno nogogo pegelama, tama aga wę te kapba tabilama, tama eno te Ferobolo mani,” wali.
12Josepgo te po wali, “Te na page e tiwai dao, te wain nologo sela wali, te sela sogo bodolu mani. 13Te sela sogo wali silisiąbadi, tama Ferogo nage ma sagasaibao. Tama agai nage, te naga yali sęba ma muaibao. Te nago hasia polobadu te wain sę tonalubo tobolu bidi bidiyu, te nago wain tuabo kap te Ferobolo mani tiwai gilama, te nago te wain wę kap te Ferobolo mawaibao,” Josepgo te po wali. 14“Te nage bugagia bidibo sogo, nago ena homugo konea palao. Nago ena homu dene elama, tama eno nogi Ferobolo olama, ena e kalabuside bidibo tagalumainao. 15Magi baso meni, te hasia mu te bidi dabego ena te Hibru dabego bulude te olo sę ebo bidi tiwai elama, wi sela asali. Te megi e tǫde me, te eno magi sę me deli isiąbadi, te ena augwaligo e kalabusiba muani,” te po wai.
16Te bret nigibo be tonalubo tobolu bidigo te na page odali te wiegi yai ebaso, tama agai Josepbolo te po wali, “Eno me eno na yali. Te na tama tiwai yali, te eno tobolude te basket sela tolali, tama te tobage te plaua dabe nigali bret te pągąwai. 17Te ugwadu polaluali basketde te tobage tigidali te bret me bisket te pągąnaluali, te Ferogo wei ebo nai dao. Tiali goli, te ba dabego te bret dabe tubo sę yai,” te bidigo te po wai.
18Tama Josepgo te po wali, “Te na yali page te e tiwai dao, te sela wali basket te sela sogo bodolu mani. 19Te sela sogo bidali silisiąbadi, tama Fero agai nage te kalabus bedu dogoni mage togwaibao. Tama agai nage tigi te ni me deli walama, tama te ba dabego nago tigi mi tuagasaibao,” Josepgo te po wai. 20Te sela sogo wali pedelama, tama Ferogo te tigidali sę ebo bidi dali te aga idago aga ame nani bodolu side te genuai nai da ulama, tuainu yali. Tama agai te wain tonaluali tobolu bidi, me te bret ulubo be tonalubo bidi me, te augwali si oda selama, tama augwali si te aga sę ebo bidi dabego geduba dolaluagasali. 21Agai te wain sę tonalubo tobolu bidi te aga sęba ma tagala palali. 22Tiali goli, Ferogo te bret ulubo sę yali tobolu bidi te niba walali. Te sę dabe pedelali, te Josepgo augwali sigo te na yali po page pusali sogo te wali po tiwai gilama yali.
23Tiali goli, te wain sę tonalubo bidigo te Josep homugo kone me ebeo. Agai homugo te aga homu dene mu gegeda palali.
Copyright information for
MPS